有話說﹕父母默書恐懼症

【明報專訊】最近好多人都討論小學生嘅功課量問題，Mama覺得，如果功課係細路仔嘅敵人，咁默書簡直就係家長嘅「宿敵」！我相信，家冇乜幾多小學生係唔使默書，「有人性」嘅學校，就今個星期默中文，下星期默英文，「無人性」嘅學校呢，夠膽死同一個星期默晒中、英文，唔單止細路仔辛苦，陪太子溫書嘅父母一樣咁淒涼，Mama身邊就有唔少家長朋友患上「默書恐懼症」，每個星期都如臨大敵，腎上腺素飈升。


講起默書，Mama成肚苦水，讀默還好，背默仲攞命。好似中默咁，如果叫細路仔背默詩詞歌賦，Mama唔反對，甚至舉腳贊成，但背範文就真係嘥氣，叫學生背篇《洗澡》把鬼咩，漏個「的」字又扣分，漏個「，」又扣分，根本就浪費時間。


就默書呢個話題，Mama同香港培道小學陳敏儀校長傾過，原來佢都發現呢個問題，「一直以來，培道都係隔周中、英文輪住默，但好多家長向我反映，尤其係有讀寫障礙嗰班小朋友，佢哋每星期要花大量時間去處理默書呢個問題，但結果相信大家都估到，佢哋所得嘅分數，同付出係完全唔成正比嘅」。


因為咁，引伸到陳校長向全校小一至小六嘅學生家長進行問卷調查，希望了解小朋友究竟要花幾多時間溫習默書，又要花幾多時間溫習測驗，得出來嘅結果，令佢大吃一驚，「原來佢哋花喺溫默書嘅時間，比花喺溫測驗嘅時間仲要多，但其實默書喺培道只係佔好少分數，只不過佔整個學期中、英文科嘅5%，咁係咪值得要學生溫得咁辛苦呢？」

默書與認字量沒直接關係

最重要係，陳校長觀察多年，發現學生默書多寡，同認字量無好直接嘅關係，反而如果有多啲空間畀小朋友睇書，閱讀量夠大的話，佢哋識嘅字，可能會仲多。但佢唔贊成一刀切廢除默書制度，「呢個其實係關乎到責任感嘅培養，始終做學生，就無可避免要溫書㗎啦」。


於是，陳校長喺兩者之間取平衡，推行咗新嘅默書模式，呢個學期，培道小一生只需要默兩次中文、兩次英文！「家暫時只係喺小一試行，喺兩次計分嘅中默、英默之間，我哋加插三次唔計分嘅預默，目的係畀家長、小朋友多啲時間去準備計分嗰次嘅默書。舉例，第一次預默，如果家長真係無時間幫小朋友溫習，唔緊要，亦唔使有太大壓力，反正唔計分，你哋仲有第二次、第三次預默機會，希望咁樣拖長嚟溫習，到真正計分嗰次默書，家長同細路仔都可以應付得輕鬆啲。」


陳校長話，如果呢個默書方法可行的話，嚟緊9月新學年，二至六年級都會作出相若嘅調適，佢希望可以做出「三贏」方案，「減少默書次數，唔單止學生、家長受惠，老師亦可以省卻改簿時間，花多啲心思做好課堂設計」。