飛天朱開熱線查行李風波

【明報專訊】前港區人大代表朱幼麟（飛天朱）咬住特首梁振英女兒行李風波唔放，噚日再開記者會，公開一張由事件相關者提供嘅WhatsApp截圖，話航空公司職員因為呢件事受到壓迫。佢又設立熱線電話，呼籲知情者提供資料，強調會追究到底。


Emily就睇過飛天朱公開嘅截圖，入面兩條信息都喺4月7日嘅對話，亦即係傳媒首次報道行李風波當日。內容指特首梁振英「在電話內罵到國泰的女同事哭了」，又話「大老板（闆）非常重視，要我們全部收聲」。


飛天朱就同Emily講，信息好清楚咁反映涉事空勤人員受到公司壓迫。至於航空公司係咪因特首壓迫而咁做，佢就叫Emily自行想像。飛天朱又強調，自己會就信息嘅來源同真實性負起所有法律負任。