蔣麗芸立會請記者食炸雞 馬逢國冇食

【明報專訊】民建聯蔣麗芸（Ann姐）噚日毋懼「烏煙瘴氣」，花千幾蚊買炸雞、薯蓉同汽水，請記者喺立法會會議廳外嘅走廊享用，令一眾行家大飽口福。體育、演藝、文化及出版界議員馬逢國早前曾經形容記者喺走廊食嘢「唔健康，唔衛生，亦唔係好好睇」，Ann姐又擔唔擔心被投訴「有礙觀瞻」？Ann姐好有信心話唔會，因為自己食嘢姿勢「好靚」，又幫記者講說話，覺得記者喺立法會有採訪職責在身，邊做邊食係合理嘅。


指記者要採訪 邊做邊食合理

Ann姐行開之後，馬逢國經過走廊，Emily即刻問佢有無興趣食炸雞，馬逢國話無問題，但最終佢同記者講咗幾句都無食到。過咗一個鐘，Ann姐喺會議廳外又同馬逢國相遇，有記者即刻叫Ann姐請馬逢國食炸雞，但兩人似乎有啲尷尬，最終各自行開咗。