出動Beyond 李慧琼點歌籲泛民「戰勝心魔」

【明報專訊】全國人大委員長張德江上周訪港，歷史性見泛民議員，民建聯主席李慧琼（Starry）仲幫口，請張委員長向泛民發還回鄉證。Starry噚日就玩幽默，喺facebook上載樂隊Beyond嘅《戰勝心魔》，話係「給尊敬的泛民同事」，叫泛民就算同京官溝通交流，都唔使咁驚喎。


話同京官溝通唔使咁驚

Starry同Emily講，泛民同張德江見面係好開始，而中央已釋出善意，但之後有傳媒報道政府或安排立法會議員到訪深圳，佢聽到泛民有唔同反應，有人以立法會會務繁重為由抗拒，有人又好似擔心如果同京官會面，會被人鬧乜嘢密室談判，覺得同京官交流係好大件事。


Starry話其實泛民無必要咁多顧慮，又指雖然唔知去深圳係咪真有其事，但其實要去有幾難？半日來回已可以，所以立法會會議頻密都唔係推搪理由。


咁中央幾時先可以向部分泛民人士發回鄉證呢？Starry就答唔到，但既然張德江話咗問題總會解決，Starry話對呢件事都有信心，但估計中央需要時間處理，料未必能夠喺今夏立法會會期完結前做到。


張德江訪港，港府周圍封路，更出動8000警力，有泛民就私下講笑，話究竟係香港政府自己咁嘅安排，定係張德江需要「平衡心理」，話因為張德江嚟到要「好委屈」見泛民，又要聽泛民批評，所以要喺其他安排上獲最高規格待遇，彌補佢見泛民時吞聲忍氣喎。