東九現「特首要變」橫額 Paul：多謝二次創作口號可重見天日

【明報專訊】「香港須改，特首要變」橫額重現九東！有「西環契仔」之稱嘅立法會議員謝偉俊（Paul），早排喺街頭掛呢個「要變」嘅橫額，橫額無耐就因為收到意見而「被消失」。阿Paul噚日就喺facebook出post，將呢句口號重現。佢其實係上載東九龍社區關注組陳澤滔喺街上掛嘅新橫額相，而阿滔就擺明「惡搞」，用番阿Paul嘅字句。阿Paul都好大方，仲大讚人哋幅橫額，「多謝二次創作，令『香港須改 特首要變』重見天日！」


不過，阿Paul留言加咗一啲hashtag，包括「#我個心好苦」及「#但係我唔講得」等，唔通佢有口難言？阿滔就話，喺九東掛咗幾張諷刺阿Paul嘅橫額，話阿Paul受到壓力唔敢掛，咁佢就幫手掛，但佢話家香港係有制度問題，唔係淨係換咗特首香港就會變。