踩單車感受到「反恐規格」 郭榮鏗灣仔被警三度喝停

【明報專訊】全國人大委員會長張德江訪港，唔少地方道路都實行「反恐規格」嘅保安同封路，公民黨法律界議員郭榮鏗前晚親身感受最真實嘅「反恐規格」，喺灣仔碼頭一帶踩單車被交通警員3次喝停，其中一次係因為特首梁振英嘅座駕要從後方超越。郭榮鏗笑言可能自己人氣唔高，警察認唔出，但就算認得出，佢都無特權啦。


郭榮鏗前晚參加咗「沉默的騎行」，悼念騎單車時因意外去世或受傷嘅人。郭榮鏗喺facebook話當時一行幾百架單車喺尖沙嘴鐘樓出發，踩去深水埗再折返鐘樓。佢踩完後就拎單車搭船去灣仔，再踩返立法會。


點知郭榮鏗分別喺灣仔碼頭、港灣道同港灣消防局被交警截停，3個地方都要等完又等先獲放行。郭榮鏗喺消防局門口撞到啱啱出席完與張德江晚宴嘅副運輸及房屋局長邱誠武、副環境局長陸恭蕙，邱誠武仲笑笑口問：「喂，踩單車咁開心呀？」


郭榮鏗話會約邱誠武同陸恭蕙討論香港單車嘅路權問題，認為市民能夠用單車代步，唔單止有多個便宜嘅交通選擇，空氣都會清新好多。