荔園夏日回歸 周一公布詳情

【明報專訊】「荔園小天地，最多快樂陪住我哋」，闊別港人多年嘅荔園去年暑假重臨中環海濱70日（圖），荔園主席邱達根（Duncan）決定今年再接再厲，舉辦「荔園Super Summer 2016」，至於喺邊度搞、有咩玩，公關公司暫時賣關子，喺星期一嘅發布會至公布詳情。


荔園舊年6月底起重臨中環70日，昔日嘅招牌大象「天奴」化身機械象遊戲，又有經典嘅「掟階磚」換香口膠，令港人恍如重拾童年。荔園去年入場人次目標係100萬，最終成功達標。當時Duncan預咗無錢賺，但都想繼續搞，仲話日後要加入新元素、新遊戲，等市民有新鮮感。Duncan下星期一會開記者會，公布各項景點同遊戲活動，仲有荔園嘅發展方針。