網頁收費資料被指過時 通訊辦﹕唔好用嚟格價

【明報專訊】消委會噚日公布家居寬頻格價，當中提到通訊辦網頁列出嘅收費資料outdate，搞到消費者唔知點比較，好似有營辦商提供嘅資料仍然停留喺2003年非無限數據量計劃，又有供應商仲畀緊2006年嘅撥號連線收費。家屋企寬頻嘅最高網速已經講緊1000Mbps，仲用56K，點做「宋太太」煲劇？


僅列收費上限 與實際收費無關

通訊辦噚晚即刻出稿澄清，話營辦商可以自行釐定收費，同時提供唔同種類嘅優惠同折扣，唔需要通訊局批准。網頁上公布嘅收費資料，其實係營辦商向客戶收費嘅上限，同營辦商推出有關服務時實際收取嘅服務費水平無直接關係，換言之，只要無加價就唔使更新。通訊辦仲提醒消費者唔好用呢啲資料格價。


呢個講法啱唔啱聽見仁見智，Emily就覺得既然放得喺「消費者焦點」，又叫人唔好用嚟格價，咁用嚟做咩呢？其實向消費者提供資訊，貼地啲都好應該。