社企貴買紙皮轉售 助長者重拾尊嚴

【明報專訊】社會創新及創業發展基金噚日公布首批25個經由創新計劃獲批資助嘅項目，總資助額1000萬港元，預計惠及2.5萬人。其中一間獲資助嘅社企「拾易紙長」，創辦人胡煒豪（Herbert）同朋友舊年11月開始，以高過市價向老人家購買紙箱同紙皮，再轉賣畀迷你倉公司同海味舖等。


險被誤會騙案 誠意打動

Herbert話公司已經同近20個長者建立合作關係，每個禮拜定期收集紙箱。Herbert話有老人家起初聽到佢話要用高價收紙皮，差啲以為係騙案，Herbert唯有用耐性同誠意打動佢哋，最終唔單止幫拾荒長者改善經濟，亦令佢哋重拾自信同尊嚴。


社創基金千萬資助25項目

社創基金喺2013年9月成立，基金由扶貧委員會之下嘅專責小組監督運作。由舊年4月開始，基金收到108個項目申請，除咗首批25個資助項目外，預計未來兩年會再批出80個資助項目。今次獲資助嘅項目中，服務對象涵蓋長者、低收入人士同更生人士等弱勢社群，預計受惠人數超過2.5萬。政務司長林鄭月娥出席基金啟動禮致辭時話，現屆政府認為需要多應用科技，鼓勵跨界別合作同埋用創新精神試驗唔同服務模式，從而產生新業務，為青年同基層創造向上流動機會。而社創基金就係一個實驗性質計劃，幫助培育社會創業家。