非執董缺席股東會 近半「貴人事忙」

【明報專訊】香港上市公司非執董經常被詬病參與程度唔高，港交所（0388）上星期就出咗份企業管治報告，列咗5項遵守率最低嘅上市條例，非執董缺席股東大會排名第三，遵守率唔夠77%，當中近五成原因係有其他工作安排而無法出席，股東會通常一年都係開嗰幾次，呢班非執董真係忙得好緊要咁喎。


打工請假如果都可以好似呢班董事咁寫句「有嘢做」就得都幾好，不過對唔少同時幫緊幾間公司打工嘅非執董嚟講，如果要出席晒咁多間企業嘅股東大會又真係有難度。


至於有主席唔出席股東周年大會係因為健康理由，小琴就諗起，上星期誠哥因為腸胃炎而首次無出席到長和（0001）嘅股東大會，連超人都病，相信大家都會體諒。5條守則條文中遵守率最低係A.2.1條「主席與行政總裁的角色區分」，得57％，其實香港咁多家族企業，唔使分咁細，大家都是自己人嘛。


email: piano@mingpao.com

[小琴密語]