學生發明隨身冷氣機 科學賽奪亞

【明報專訊】科學研究唔係科學家嘅專利，唔少學生憑住創意研發出實用產品，仲喺國際比賽中突圍而出。教育局早前同香港青年協會等機構合辦學生科學比賽，有參賽隊伍研發出迷你冷氣機同埋智能車，創意十足。


叉滿電涼足4個鐘

好似九龍華仁書院學生就憑「迷你智能冷氣機」喺比賽高中組發明品類別中勇奪亞軍，隊員、中四生梁迪軒話冷氣機用致冷晶片製造，唔使用雪種，叉電後可以用4個鐘頭。冷氣機仲可以外接電源，只要帶埋叉電器，就可隨時隨地使用。Emily成日要周圍去採訪，呢部冷氣機啱晒。


智能車代表香港揚威美國

另一參賽隊伍基督教宣道會宣基中學研發載貨用嘅智能車，就喺比賽中拿到優異獎，並且獲評審團推薦，代表香港去美國參加「國際可持續發展項目奧林匹克競賽」，喺工程類別入面攞到銅獎。智能車負重可達60公斤，只要戴上控制手環，配合4種簡單手勢包括打開手、握緊拳頭，又或手掌向左右撥，就可以遙距指揮車嘅移動，唔使推車，從而減少肌肉勞損。