形容班子士氣好 CY：官員做到髮少腩突

【明報專訊】特首梁振英（CY）好少接受傳媒訪問，但近日就向傳媒伸出友誼之手，繼日前同傳媒做訪問講一帶一路後，噚日就接受商台節目《政好星期天》訪問，講吓各項政策、近日時事及自己做特首嘅感受等。雖然CY經常畀網民鬧，泛民又經常叫佢落台，但似乎CY對批評都睇得好開，佢話覺得政治就係咁，無論邊個做，其他人都想取而代之。


「有人話我白髮多咗」

CY話，佢嘅競選政綱大部分都做緊，形容得嘅比失嘅多。佢又引述有人話佢白頭髮多咗，而班子內嘅官員亦然，有人白頭髮多咗、有人皺紋多咗，亦有人頭髮少咗，有人就因為多應酬、少運動而「肚腩出咗嚟」，雖然CY提及嘅例子並無點名，但相信讀者們都可以自行聯想，相信肚腩出咗嚟嘅應該包括政制及內地事務局長譚志源，佢早前講過處理政改嘅20個月期間，肥咗15磅，體重直逼200磅！而發展局長陳茂波近年嘅白頭髮，亦明顯較佢幾年前做議員時多咗好多。


講咁多，其實CY都係想講班子努力為民做事，佢話作為公職人員，改善市民生活係最大目標，有成績就會好開心，形容成個班子上任4年以來仍然「拚勁十足，士氣相當好」。