網絡短片戰 岳橋扮毒男 工聯出三姝

【明報專訊】立法會9月選舉臨近，家做宣傳唔能夠只流於街頭派傳單，仲要打網絡短片戰，公民黨楊岳橋就不惜摒棄西裝形象，著格仔衫扮「毒男」，控訴港鐵票價有加無減，搞到毒男只能喺港鐵車廂睇住自己心儀嘅女仔，唔敢出閘去追求，因為出閘就要畀多程車費。岳少今次仲搵埋「專業離地嘅愛情飛行員」譚文豪chok住咁教毒男脫毒，話「毒……燃未來，杜絕最該」。


周浩鼎出「鼎訊」

岳少同飛行員先軟後硬咁提出佢哋對減低港鐵票價嘅建議。不過，短片過癮之處係末段搵埋公民黨郭家麒醫生客串，郭醫生好認真咁教人戒毒，例如服用美沙酮等，但對於點樣幫一眾「毒男」脫毒，郭醫生就扮到一臉無知，話唔知乜嘢叫毒男，因為佢嘅專長係泌尿科！


建制派都開始明白網絡嘅重要，民建聯周浩鼎就定期出「鼎訊」短片，最新一集搵嚟黨友、沙田區議員李世榮，以傳統少少嘅訪問方式講雙職父母嘅壓力，然後建議政府增加支援課後託管服務。


工聯會三姊妹麥美娟、劉桂容及陳穎欣就齊齊變靚啲，著雪白衣服化濃妝拍片，提醒一眾姊妹關注醫療美容，要靚又要命，靚靚短片就快有得睇。