林煥光愛《海闊天空》 信「愛自由」與生俱來

【明報專訊】商台噚日繼續播出行政會議召集人林煥光嘅訪問，大談被視為「社運歌」嘅《海闊天空》，佢話自己1980年代已經好留意樂隊Beyond，當年聽到《海闊天空》已經「鍾意到不得了」，相信「愛自由」係與生俱來嘅特性。


林煥光話，當年對黃家駒可以寫出《光輝歲月》等歌曲感到好意外，「香港有年輕人視野可以咁宏大，寫出咁有意思嘅歌」，又話家駒唔係高學歷出身，中學畢業後做過好多低收入工作，都可以寫出咁有世界觀嘅歌曲，令人好欣賞。佢覺得大家要珍惜香港有好好嘅土壤，「我哋咁好機會，仲怨乜怨物？家駒都係咁樣出到嚟」。


林煥光又講當年做特首辦主任，佢讚時任特首董建華「膊頭好闊、心胸好深」，作為「幕僚長」可以誠實向阿董直諫。


林煥光話自己職責係畀阿董聽到真話，工作上雖然有唔少衝突，阿董亦責怪過佢言論太偏頗，但仍然會繼續聽意見。佢讚阿董有胸襟容許官員直率發聲，對領導人嚟講係珍貴嘅風範。