幼園「飛書包」 交校董會處理 網傳校方向家長致歉

【明報專訊】唔少港媽港爸都會喺小朋友細細個就用心栽培，幫佢哋報興趣班、補習，百足咁多爪；近日網上流傳一段短片，有幼稚園老師「飛書包」咁派書包畀學生，有家長睇到段片好嬲，話唔單止教壞細路，仲有可能整親小朋友。


Emily睇過據稱喺旺角富榮花園迦南幼稚園拍攝嘅片段，有老師喺課室分發書包，有人以「飛書包」嘅動作，將書包拋向桌面，有書包更拋咗落地上，由小朋友自己執番。Emily打電話問過學校，職員只係話事件由校董會處理中，稍後會向家長交代。


噚日下晝網上又再流傳一張迦南發畀家長嘅通告，確認事件喺其中一間分校發生，校方話對片中老師行為「十分震驚、忿怒、心痛」，會對相關老師作嚴厲處分，話對事件「深感抱歉」。


教界：唔尊重小朋友物件

本身係幼稚園校長嘅教聯會副主席林翠玲話，老師有咁嘅行為唔啱、無禮貌，「係唔尊重小朋友物件」，而片中老師背住學生，或會忽略照顧。


佢認為老師係學生嘅榜樣，校方應檢討事件，又建議以片中學生年紀，可以教佢哋自己攞書包，培養小朋友自理能力。