兗煤連中「兩槍」 即搵大公撐腰

【明報專訊】兗州煤業（1171）啱啱被惠譽降評級，噚日又被標準普爾從BB下調至BB-，展望為負面，降級因素包括煤炭行業維持疲弱，削弱公司現金流，且削減過剩產能亦有風險。今次兗煤真係火都嚟，即刻搵國產評級機構大公國際「撐腰」。當然大公國際份報告就完全唔同，對兗煤信用評級為最高嘅AAA，評級展望維持穩定。


不過大公份報告都話煤炭行業低迷，公司償債壓力增大及面臨資本支出壓力，至於點解仲要畀最高評級，理由就係公司煤炭產量大，融資渠道暢通。


聽講舊年內地公募債市場有400間發行人得到AAA評級咁誇張，早就氾濫，以前都好少有中資企業攞內地評級機構報告來反駁國際評級機構，唔知係咪此前內地官員斥國際評級機構「有偏見」而令一貫被「蝦」嘅中資壯膽唔少？

email: piano@mingpao.com

[小琴密語]