選民登記結束 政黨擺街站最後衝刺

【明報專訊】立法會選舉喺9月4日舉行，想投票就要喺噚日前提交到選民登記表，而不同政黨及團體就最後衝刺，噚日擺街站。青年新政就話噚日真係「堅抽deadline」，錯過咗就要等多3年先有得投票，而佢哋噚日一直開街站到下晝5點半，然後將收集到嘅表格送去選舉事務處。民建聯陳克勤就做填表員，幫街坊填表格。公民黨主席余若薇及黨魁梁家傑等，噚日就喺銅鑼灣呼籲市民登記做選民，叫大家「趕尾班車」喺9月立法會選舉中投票，仲話「狼英去留 九月公投」。


噚日係公眾假期，選舉事務處都作出特別安排，位於灣仔港灣道海港中心及九龍灣展貿中心嘅辦事處，噚日特別開放接收市民送交嘅表格。該處話，成功登記人士嘅資料同已登記選民嘅更新資料，將會被納入今年7月發表嘅2016年正式選民登記冊。