回想大學時 同李永達「根本係一伙人」 林鄭：做社署署長最有成就感

【明報專訊】曾言「官到無求膽自大」嘅政務司長林鄭月娥喺官場打滾36年，建立「好打得」嘅形象，佢噚日接受商台專訪時回顧從政生涯，話大學時活躍於社運，與李永達、單仲偕「根本係一伙人」，無諗過可以考到政務主任；為官係希望能夠喺「建制內」改變佢認為不公義嘅事情，結果一做就36年。林鄭話「如果我不覺得做到（初衷），我不會留到今天」，但令佢最有成就感嘅職位唔係「一人之下萬人之上」嘅政務司長，而係社會福利署長（2000年至2003年）。


當年計較名次 「可能有啲」心理問題

讀書時期年年考第一嘅林鄭月娥，中學有一次突然考第四名，結果佢返到屋企係咁喊，嚇壞媽媽，佢最終以重奪第一名來克服挫折。家諗番轉頭，林鄭形容當時「荒謬」，自己「可能有啲」心理問題。考入大學後，林鄭形容有兩個「污點」：參與社運同組織首個港大到清華大學嘅交流團，佢認為自己做咗呢兩件事，會令佢落選政務官，所以獲取錄前仲去政府外靜坐。


加入政府後，林鄭嘅官位愈攀愈高，但佢覺得最有成就感嘅職位係社署署長，因為感覺可以跳出框框，做到學生時代嘅目標。佢好坦白咁話，工作雖然曾有感到挫折嘅時候 ，但從無諗過要離開政府。