有話說﹕全日制小學 下晝唔上堂？

【明報專訊】Mama有時諗番起自己細個時，日子真係過得好逍遙。當年小學仲係行半日制，Mama讀下午班，瞓到早上九點先起身，如果當日要默書、測驗，就再溫習下，否則，就梗係睇卡通片啦！食完午飯，十二點半先施施然出門口，眨下眼，下午五點幾又放學囉。


相比起，家陣啲細路就慘得多，返全日制小學，朝早未夠七點就要爬起身，匆匆忙忙咬個麵包就換校服趕喺七點九返到學校，上完N咁多堂之後，如果好彩唔使補課、練樂器、練波之類，就下午三點三放學，否則隨時五點先返到屋企。得幾歲人仔，踩足十個八個鐘，日日返到屋企成條喪屍咁，仲要應付一大堆功課，睇見都心痛。


做到無氣唞 應檢討全日制課時

Mama個人好想恢復半日制小學，但又好明白呢個願望係不切實際，正如九龍禮賢學校校長劉斯嫦所講，要政府推倒重來，行返半日制小學，係相當困難嘅事，倒不如推動教育界，重新檢視全日制小學嘅上課時間表，睇下有冇空間畀小朋友唞下氣仲實際。


好似禮賢小學咁，自2000年轉做全日制之後，已經實施逢星期一至五，午飯之後唔需要上堂，畀學生用嚟做功課及參加課外活動。星期五仲特別，如果無參加團契或管弦樂團嘅小朋友，仲可以下午1:45提早放學，迎接愉快嘅周末假期。


劉校長話，有咁嘅安排，係佢覺得，學習唔係上課時間愈長，就學得愈多，况且下午「飯氣攻心」，大家都攰，學習效能低好多。與其係咁，不如利用下午時間，畀小朋友伸展下、玩下，又唔使等到三點三放學返屋企之後，先開始做功課。佢仲笑笑口話，禮賢咁多年嚟，派位、TSA成績都好理想，就證明佢嘅學生唔會學得比人少啦！


除咗禮賢之外，香港培道小學校長陳敏儀亦係有心人，佢喺2011年大執時間表，終於成功騰出逢周一、三、五午飯後嘅時間，又係用嚟畀學生做功課及參加課外活動，大受家長及學生歡迎。


其實陳校長同劉校長嘅理念都好相似，陳校長好想學生放學後，可以同父母有多啲親子時間，而唔係晚晚為功課角力，加上一、三、五嘅下午，學校已經提供好豐富嘅課外活動，例如有樂器班、魔術班、手工班、粵曲班等等，家長就唔需要再喺周末幫細路仔塞咁多興趣班啦，可以好好享受家庭樂。


如果教育界有多幾位好似劉校長、陳校長咁「人性化」嘅校長，實在係學生、家長之福。