梁耀忠盼公民黨借票選超區

【明報專訊】街工立法會議員梁耀忠早前舉手表明有意喺9月立法會選舉時，轉戰「超級區議會」，阿忠噚日喺立法會話，目前已經得到街工、工黨、傘兵同散兵（獨立泛民）區議員支持，有望取得15張超級區議會嘅提名。但阿忠話希望拎多少少提名，就會更安全，佢仲表明如果公民黨最終決定唔派人參選超區，希望公民黨可以支持提名佢。


目前民主黨、新民主同盟、民協、街工、公民黨同獨立泛民都表態，有意參加超級區議會選舉，前3個政黨都有足夠區議員去提名自己人。公民黨只有10個區議會議席，但黨員陳琬琛早前報名參加黨內初選，有意出戰超選。Emily聽聞公民黨最快都要6月先會有立法會出選名單。


泛民主派正討論超級區議會選舉作初選嘅可行性，不過，Emily聽講初選搞得成嘅機會小於一半，因為唔係所有泛民政黨都願意參加。