民建聯全包開支 周浩鼎新東補選花逾161萬

【明報專訊】立法會新界東補選結束至今兩個月，參選人按法例要向選舉事務處申報選舉開支，落選嘅民建聯周浩鼎（Holden）早前提交資料，原來佢今次補選花費逾161萬元，單係選舉廣告就用咗超過105萬元，包括花12萬元喺大老山隧道同將軍澳隧道口掛大型廣告板，同近40萬元製作傳單。


宣傳得宜可吸引選民，但稍有失誤就會招致罰款，Holden喺競選期間，先後13次被食環署拆除宣傳品同罰款，當中5次喺選舉當日被罰，罰款埋單超過6000蚊。


新東選情曾因旺角大衝突而起暗湧，原來Holden除咗事後拍片譴責外，亦花咗2.5萬元聘請軟件公司，將譴責短片同信息，透過電郵發畀超過85萬名選民。Holden又花近10萬元做宣傳品設計，亦待義工不薄，一共畀3萬元做義工膳食費。雖然使咗逾160萬元絕對唔少，但有關開支全部由民建聯付鈔，Holden唔使自掏荷包。