抗議拆加多近街花園 許智峯紮營被潑啤酒 兩漢企定被拉

【明報專訊】民主黨中西區區議員許智峯聯同居民代表，上星期開始喺西環加多近街花園紮營30天，反對政府以除污為名，清拆加多近街花園，以及更改該處土地用途，改建私樓。許智峯同留守嘅義工噚日凌晨喺花園紮營時，遇上兩名自稱係反佔中嘅男人向營帳淋啤酒，人無事，但許嘅一對運動鞋報銷。警方以刑事毁壞拘捕兩人。


許智峯同Emily講，事發時身處營帳內，當時聽到有兩個男人喺營外談話，指摘有人佔中佔到去公園，聲稱不如「整鬼佢哋」。許智峯之後立即拉開營帳，就見到呢兩個男人向營帳同運動鞋淋啤酒。涉事嘅男人見到許智峯未瞓，唔止嚇一嚇，仲聽許智峯講企定定，無逃跑，最終被警方拘捕。許智峯話涉事男人個樣唔似醉酒。


下月初西環花園播《十年》

另外，許智峯下月初會喺西環加多近街花園舉行電影《十年》放映會，希望趁機會讓市民思考10年後嘅香港同10年後嘅加多近街花園。