財爺著劍手裝 政府網搞亂面罩頭盔被嘲

【明報專訊】政府新聞網噚日喺facebook上載咗條宣傳片，片中一班劍擊手，其中一個著黑色戰衣，同著白色戰衣嘅年輕劍手零舍唔同，揭開面罩，發現原來係財爺曾俊華（圖右），新聞網小編就喺條片下面話「揭開頭盔嗰一下，小編嗌咗出嚟！」不過，有眼利嘅網民更正話劍擊係無「頭盔」，只有「面罩」。


網民仲話：「難怪嘅，個特首都唔係真心支持體壇，hea出post又有咩所謂，唉。」新聞網小編立即從善如流更正番，但網民又再留言：「係咪改埋個特首先……」今次小編就冇再回覆啦。


今次條片曾經喺上月尾旅發局嘅業界展播過，當時話條片主題係「發揮香港本色」、「We Make The Difference」，旅發局講明會再剪輯，而噚日出街條片嘅片尾，中文嗰句就唔同咗，變成「發揮香港好客精神」，英文就無變。