張華峰﹕盧偉國可做經民聯主席

【明報專訊】隨着立法會主席曾鈺成下屆退下火線，唔少人都猜測下一任立法會主席人選，建制派內部初步有意推舉內會主席、經民聯梁君彥擔大旗。不過梁君彥家身兼經民聯主席，為咗維持立法會主席公正，又要減輕啲工作量，睇怕梁君彥一旦坐正，都要將經民聯主席位交番畀黨友接手。


經民聯副主席金融服務界議員「肥老闆」張華峰就話，預計9月立法會選舉後，經民聯要內部換屆。咁邊個做主席比較好？佢擺手話自己唔得，但認為黨友工程界盧偉國夠勤力，可以勝任經民聯主席。


就快到呢屆立法會尾聲，張華峰話，自己都努力做緊業內選民登記，不過就未收到風有無人會去挑戰佢，但係佢都唔希望自動當選。不過立法會日日「拉布」點人數，張華峰都話，做議員做到有啲悶，最慘仲要有經濟損失，因為忙住開會，無得睇實股市上落，投資自然無咁得心應手。