黃毓民盤問CY 梁家傑讚表現好

【明報專訊】立法會議員黃毓民前年喺特首答問大會上涉用玻璃杯擲向特首梁振英（CY），被控普通襲擊，案件早兩日開審，毓民盤問擔任證人嘅CY時咬文嚼字，包括質疑CY口供有錯字，拋擲唔係「摘」，又話連口供紙頁數都錯，質疑CY夾口供等。辯才了得嘅毓民今次自辯，令佢可以直接盤問CY，佢話相信呢單案無乜大狀肯接，即使有都未必會好似佢咁盤問CY喎。


呢單案件可謂一地花生，毓民噚日更獲公民黨資深大律師梁家傑稱讚，形容毓民表現好，庭上發問嘅問題有sense，真係識問嘅。而被列為案件證人嘅自由黨田北俊噚日就同毓民笑言，佢唔可以上庭做證，皆因佢一早已表明唔支持CY連任特首，呢個立場唔知會唔會令到佢證人身分唔夠可信呢？