製地圖軟件 免費開放予中小學

【明報專訊】來自美國嘅雲端製圖平台ArcGIS Online由今年起免費開放畀香港同澳門中小學使用，至今已有62間中學同11間小學用緊呢個平台，幫助學生學地理甚至歷史、經濟科等。系統供應商Esri中國（香港）有限公司嘅主席鄧淑明話，系統本身包含咗好多政府、專業資料同數據，例如全球氣象資料、香港社企分佈、英國水路環境等等，學生仲可以輸入數據，做出唔同類型嘅地圖。


培道中學老師呂志強話，佢哋學校學生用呢個軟件做咗唔少專題，包括「九龍城區社區特徵：家庭收入與長者比例」、「東涌新市鎮居所選擇」等，其中「塱原土地利用」，學生去塱原實地考察，透過GPS定位，再喺手機輸入辨認到嘅實際土地用途，就可以生成一幅土地利用分佈圖，使用方便。另外又可以整地圖故事，例如學絲綢之路，可以喺地圖上繪製路線，同埋標註每個地點嘅特徵、貨物等。


鄧淑明話有唔少學校付費使用呢個軟件，收費按學生人頭計，最平都萬幾蚊一年，家免費開放，照3年計，相當於回饋學界5500萬元。有興趣嘅學校可以喺教育城網站申請用呢個軟件，教育城亦會搞工作坊，培訓老師點用。