流浪貓慘死促成合作 港澳台同步搞保護動物遊行

【明報專訊】香港、台灣同澳門嘅市民將會破天荒為動物權益走埋一齊，三地市民會喺4月30日（下星期六），同一時間分別喺三地舉辦動物保護大遊行同集會，促請各地政府收緊法例，保護動物。屆時除咗有泛民立法會議員、演藝界朋友同社會知名人士參加，本土派組織都會派員出席，當中包括本土民主前線同熱血公民。


多個保護動物團體噚日同立法會議員一齊開記者會，NPV非牟利獸醫服務協會執行主席麥志豪話，上年台灣發生流浪貓「大橘子」被虐慘死案，疑犯喺新年期間返咗去澳門，所以麥志豪當時同「本土．動物保障團」團長鍾健平，以及台灣動保朋友一齊去澳門跟進，因而促成三地合作。麥志豪話原來三地嘅動保法例都有漏洞，希望可以站出來令更多人關注。


盼取締私人繁殖

主辦單位話香港情况極為嚴峻，大量動物因為私人繁殖氾濫而被惡劣對待，需要阻止政府放寬私人繁殖嘅發牌，因為咁樣係間接縱容民間大量繁殖同買賣動物。主辦方希望可以迫使政府收緊法例，逐步取締私人繁殖，邁向動物零買賣。


香港嘅遊行將會喺下星期六下午3時於中環遮打花園集合出發，遊行去金鐘政總。