有話說﹕囝囝志願紮鐵！支唔支持？

【明報專訊】為人父母一定緊張仔女前途，佢哋讀得成書，搵到份穩定工作，當然放心好多。不過Mama早排睇到一件真人真事，有個大學生讀開教育，父母一心諗住佢會做老師，但佢為咗一圓大廚夢，偷偷哋放棄大學學位，走去學廚，父母發現之後不知幾嬲。家佢就嚟讀完廚藝高級文憑，準備投身飲食界。雖然離夢想行近咗一大步，但依然後悔當初冇同父母好好溝通。


Mama間中都會問下對仔女，第日大個想做咩，佢哋啲答案一時一樣。好似囝囝咁，坐巴士嗰陣話想做司機，運動會嗰陣就話想做田徑選手，間中又發下歌星夢，喺屋企大聲練歌。行行出狀元嘅道理，Mama都好明白，所以唔會限制佢哋嘅志向。但如果佢哋唔想完成學業，或者想打一啲辛苦工，就難免擔心喇。


日常多觀察 探子女志向真假

Mama同明愛全人發展培訓中心高級培訓及輔導顧問葉麗貞傾過，佢話有啲小朋友嘅志願成日變，但亦有人由細細個開始，就好清楚未來想做咩。當仔女講出想做嘅職業時，家長可以先觀察佢嘅意欲有幾強，例如出街時，留意佢嘅目光畀咩事物吸引，就知佢係咪真正對嗰個行業有興趣。如果佢目標清晰丶堅定，即使係辛苦工，家長都唔好強行禁止，「逼小朋友放棄想做嘅事，佢哋會有失落感。况且家長期望嘅職業，例如醫生丶律師，佢哋未必有能力達到，勉強迎合只會帶嚟沮喪，甚至引致情緒問題」。


忌貶低特定行業 免礙親子溝通

相反，家長應該開心見誠，就仔女嘅志願一齊討論，「假設有個小朋友好想做紮鐵，覺得搬鐵好好玩，家長可以通過相關新聞，等佢知道紮鐵會污糟，而且要有好強負重能力；亦可以喺日常生活中，多啲請佢幫手拎重物，再由佢評估自己係咪捱得到」。葉麗貞叫各位家長放心，每個工種都有唔同機會，例如鍾意揸巴士，除咗做司機，仲可以做路線規劃，不妨引導小朋友，諗下點樣喺行內做得更好。家長平時都要注意，避免言談間貶低某個行業，如果唔係，萬一有日仔女真係想入嗰行，都唔敢坦白向你表達啦。