商界環保協會周年大會 董事大合照 獨欠馮永業

【明報專訊】牽涉換樓風波嘅民政事務局常任秘書長馮程淑儀小休後昨日終於復工，至於其丈夫、機管局企業發展執行總監馮永業據悉近日亦有上班處理公務。不過，呢對曾係AO界嘅金童玉女，仕途將來會否受影響，仍係未知之數。


馮程淑儀昨復工

以馮永業為例，上周五被選為商界環保協會新一屆董事，代表機管局坐入董事局，同一屆成員仲有代表會德豐嘅易志明，新地嘅苗學禮等，中電藍凌志就被選為協會嘅董事局主席，任期由2016年至2018年。Emily聽講，全體董事局成員共有20人，上周五協會舉行周年會員大會，仲即時影大合照，不過數一數，張相中只有19人，獨欠馮永業。據講當日佢缺席活動，所以無影合照，但仍然係董事，至於乜嘢理由缺席就唔知喇。


1992年成立嘅商界環保協會係由商界成立嘅慈善機構，宣揚潔淨技術及措施，從而減少廢物及保護資源，推動社會可持續發展，邁向低碳經濟。