迎海外名駒 馬會派車隊接機

【明報專訊】馬會女皇盃同冠軍一哩賽分別喺4月24日同5月1日舉行，兩項大賽共有9匹海外名駒來港，佢哋全部喺比賽前約10日嚟到。呢批名駒戰績彪炳，身價動輒過千萬，去接機同運送嘅運馬員陳紹榮都話唔敢怠慢，所以有一定壓力。


兩匹日本參賽馬「朗日清天」和「新紀錄」率先喺上周四晚搭貨機運抵本港，馬會就好大陣仗，由陳紹榮、獸醫、司機等一行10人去接機，再送往沙田馬場檢疫馬房。佢話，「同行有5部車，大馬車、小馬車、工程車、獸醫車與後勤指揮車」，工程車係一旦馬車途中故障可即時維修，獸醫則可為有問題馬即時診治。


陳紹榮喺1973年加入馬會做運馬員，多年來喺機場迎接及送走馬兒數目數以萬計，佢話要令馬落機後乖乖上馬車有三大法寶。海外馬唔熟習新環境，抵埗後會驚，所以第一步要先安撫，輕拍佢哋頸部，等佢哋感覺安全先會上車；如果馬仍拒絕上車，佢就會引領馬原地轉圈，等佢哋失去方向感自然會上車；第三係用布半蒙頭，如果馬睇唔見，就會更聽從指令。