廉署呈堂文件疊到天花板

【明報專訊】廉署新一輯《廉政行動2016》嚟緊嘅周六啟播，一共有5集，分別講區議會賄賂選民、鐘表集團賄賂導遊、商人行賄銀行貸款部高層、煙草公司董事收取走私客賄款同商家造假詐騙，廉署話雖然每集主題不同，但同以往嘅單元劇不同，今次5集劇情連貫，旨在吸引大家追劇咁話。


新劇有真實區議員個案

當中一集講鄭丹瑞（阿旦）飾演嘅區議會候選人，未表露參選意向已搞居民合作社話要為街坊謀福利，強調「真心為街坊」，但蛇齋餅糉背後係為之後嘅選舉。廉署社區關係處首席傳媒宣傳創作主任黃潔梅就提大家，留意吓旦哥用咩招數走灰色地帶、同廉署玩咩心理戰，最後調查人員又點樣搵出證據，證明「天網恢恢」。今次嘅劇情都係綜合真實個案，但黃潔梅就叫大家都係唔好估邊單打邊單。


多講調查員心理掙扎

今次另一大特色，係廉署調查人員嘅角色較以往重咗。廉署執行處首席調查主任高迪龍話，劇中多咗好多情節講調查過程同人員嘅心理掙扎，淨係劇入面嘅file，就令佢諗起呈上庭嘅文件都要疊到天花板咁高，令佢睇得好有共鳴。但最令佢感觸嘅係，劇中江美儀飾演嘅首席調查主任，一邊查案一邊面對人生多個關口，最終有埋絕症，令佢諗起同期出身、2012年獲追頒廉政專員嘉許狀嘅謝旭昇。謝sir當年喺重病下都努力追查一宗上市公司高層串謀詐騙及洗黑錢案，高sir話希望觀眾睇劇時會體會到調查嘅辛酸。