港澳研究會季霆剛：倘黃之鋒等海外籌款 即告眾志詐騙

【明報專訊】由黃之鋒等人成立嘅政黨「香港眾志」早前不斷甩轆，甚至湧現相關「假網站」，提倡公投自決又被建制派批評可能違反法例，可以話面對左右夾擊，最新一單麻煩事，就係全國港澳研究會會員、民建聯成員季霆剛話，黃之鋒同黨主席羅冠聰下星期去美加大學巡迴演講，估計佢哋必然喺海外籌款，一旦佢哋咁做，佢就會聯同其他研究會會員報警指控香港眾志詐騙。


黃之鋒未回應

季霆剛話，香港眾志未獲得公司或社團註冊，又未有銀行戶口，質疑以佢哋嘅往績，必然會喺海外籌款，咁即係接受境外財資到個人戶口。佢話如果香港眾志最後都做唔到社團或公司註冊，但喺海外「集資」，就有可能構成詐騙罪，而且係跨境犯罪。佢話如果捐款係畀一個團體或公司，但最終個人落袋的話，就有理由懷疑有犯罪成分，係政界「種金騙局」、「龐氏騙局」，有關部門必須注意。


Emily噚日問過黃之鋒，但截稿前未有回覆。