謝偉俊橫額掀「作反疑雲」 拒透露「香港須改 特首要變」「玄機」

【明報專訊】有讀者向Emily報料，指曾被人形容「西環契仔」的立法會議員謝偉俊，竟然喺九龍東一帶掛出「離經叛道」嘅橫額，上面寫住「香港須改 特首要變」8個大字，唔通阿Paul作反？想中央換咗特首梁振英？

Emily問阿Paul，佢係咪支持明年特首選舉要換人，唔好畀梁振英連任？佢只係笑笑口叫Emily自己想像，唔係好肯再解釋8個大字講乜。有心水清嘅人分析話，「特首要變」呢4個字可以好多演繹，除咗話換人，亦可以話特首做事作風、行事方式要變，可能Paul想試吓水溫，掛吓呢啲橫額睇吓街坊反應先。


幫網媒主持法律節目

唔講橫額，不如講下Paul最新動向，原來星期二佢去咗幫網媒謎米香港做主持，節目叫《法乎情》，都係用佢嘅法律知識分享下對唔同case嘅睇法，謎米老闆係蕭若元，最近老蕭宣布退休，加上部分主持離開，所以謎米都有搵吓人幫手，Paul話都係第一次做節目時，見到有啲網民有鬧謎米點解搵建制派做主持，但阿Paul唔介意，乘機可以接觸網民都未嘗唔係好事。