銀行打畀王惠芬 提醒戶口用途

【明報專訊】「香港眾志」早前用副秘書長周庭嘅恒生銀行開設嘅個人帳戶，暫代收取市民捐款，但就被恒生以戶口並非作私人用途為由，取消有關戶口提款外嘅所有功能。香港眾志九龍東團隊幹事王惠芬（Fermi，圖）雖然話自己唔係眾志黨員，但佢噚日透露，有銀行職員打電話提醒佢，佢嘅帳戶只可以作儲蓄同出糧等用途。


Fermi喺facebook講，噚日第一次收到銀行職員致電，查核戶口內每個入帳同轉帳，仲「提醒」佢銀行帳戶用途，亦有查問Fermi職業同收入。Fermi話「唔知關唔關幫政黨做義務顧問嘅事」。


周庭噚日出席電台節目之後，都話經過一個多月時間，香港眾志仍未可以成功註冊做有限公司，佢哋會繼續等待註冊回覆，亦會搵其他方法收取捐贈，但現時未有具體解決方法。