姚思榮「被支持」開紅燈區

【明報專訊】立法會保安事務委員會前日討論過去5年，逾期居留及非法入境者從事賣淫被捕人數上升，會計界議員梁繼昌就建議設立「紅燈區」，仲話旅遊界議員姚思榮都支持。姚思榮噚日就忍唔住向Emily同成班行家講﹕「佢（梁繼昌）突然間講呢個問題，我都有愕然，當然佢有佢睇法啦，因為今日唔少人問我態度點樣，所以我今日要喺度澄清我睇法。」


姚思榮話自己唔支持喺香港設立紅燈區，「因為作為利用紅燈區發展旅遊業，呢個做法喺香港社會好難實行」。佢解釋，因為香港地方比較細，如果喺任何一個地方開紅燈區，都會影響周邊家庭同小朋友。佢又話，香港係文明社會，設立紅燈區無正面啟發，「我哋始終係一個中國人為主嘅社會，內地市場佔好大，如果香港開紅燈區，負面信息好明顯，我哋唔可以同歐洲或者其他相對開放國家比，始終我哋有自己嘅社會道德觀念」。


咁究竟點解梁繼昌話姚思榮支持開紅燈區？姚思榮就苦笑話「我都唔明呀，可能我坐佢後面啦」。Emily噚日試過搵梁繼昌，但至截稿前未有回覆。