倪震嘆無途徑做選委

【明報專訊】中聯辦法律部部長王振民噚日去外國記者協會大談法治，吸引唔少人去聽，其中行政會議成員胡紅玉亦係座上客，Emily仲見到小說家倪匡個仔倪震，佢聽足全場。


《Yes!》雜誌創辦人、一度移居加拿大嘅倪震話，佢其實係外國記者協會會員，不時都會出席呢類活動。佢話家社會撕裂，但覺得大家唔應該facebook化，不同意見都應該聽吓，無論係黃絲定藍絲、獨立嘅團體點講，都可以了解吓，盡量去理解。倪震話，自己由細到大都有留意時事，覺得其實唔係所有嘢都有對錯，形容每個人都有道理。


倪震話，佢同爸爸倪匡就係好例子，雖然自己同老竇睇法唔一樣，但都有交流時事，知大家點諗，強調唔應該否定其他人諗法。


問到倪震支唔支持特首梁振英連任，佢就話「邊到我講支唔支持」，因為自己唔係選委會成員，無份投票，佢話自己係傳媒人，又有開酒吧同桌球室呀咁，但就搵唔到有咩途徑參選選委囉，倪震話「有得選我願意選，但我睇唔到邊一條路possible」。