客家話拍片 何君堯再出動陳小春拉票

【明報專訊】唔少立法會候選人都各出奇招拉票。參選新界西嘅前律師會會長何君堯就出動星級助選團，搵藝人陳小春拍片助選。其實陳小春已經唔係第一次幫手，舊年何君堯區選混戰嗰陣，佢都有落區站台，睇嚟兩人關係都幾密切。


原來兩個人仲有共同點，都係客家人。佢哋喺宣傳片度仲用客家話嗌「撥亂反正、破格求變」口號。但兩個都似乎唔多熟，陳小春講完都笑咗出來，仲反問「係咪咁講？」陳小春喺片裏面舉起大拇指大讚8號「何君堯律師，掂呀！」


雖然對手民建聯陳恒鑌無明星助陣，不過民建聯元老譚耀宗噚日落區幫佢站台，同樣有影響力。譚sir仲話，陳恒鑌抽中16號同自己上屆號碼一樣，係天意，所以「睇到16號，就代表陳恒鑌又代表我」。


立法會選舉其他新界西候選人名單有黃潤達、尹兆堅、高志輝、周永勤、鄭松泰、鄺官穩、田北辰、梁志祥、郭家麒、黃浩銘、李卓人、黃俊傑、麥美娟、馮檢基、張慧晶、呂智恆、湯詠芝及朱凱廸。