黃百鳴認因《十年》得獎黑面

【明報專訊】電影《十年》獲得香港電影金像獎「最佳電影」後，資深電影人黃百鳴就批評該片獲獎係「笑話」同「極大錯誤」。黃百鳴噚日出席「娛樂智多星——新藝城的光輝歲月」展覽時就直認，嗰晚知道賽果時係有「黑面」，但改口話唔係針對《十年》，而係對金像獎嘅評審準則。


話不滿評審準則 唔係針對電影

黃百鳴同Emily講，其實嗰日嘅批評唔係要針對任何電影，而係覺得如果係最佳電影，就算唔係台前幕後每個崗位都盡善盡美，至少都要合格。至於咩叫合格？佢就話「每個（電影）都要有幾項提名」。


黃百鳴之前直認無睇過《十年》，但就批評頒獎係笑話，事後都畀人批評佢有《十年》恐懼症。至於有冇打算睇《十年》，黃百鳴就點都唔答Emily，只係不停話自己嘅批評唔係針對套電影。而《十年》嘅兩個導演伍嘉良同歐文傑，噚日就喺商台節目回應立法會體育、演藝、文化及出版界議員馬逢國話《十年》獲獎受爭議係因為牽涉到分離主義，佢哋覺得大家應該睇咗套戲先評論。雖然個回應唔係針對黃百鳴，但Emily覺得套用落去都幾夾。


「娛樂智多星——新藝城的光輝歲月」展覽喺香港電影資料館展覽廳舉行，直至6月19日，介紹1980年代喺影壇舉足輕重嘅新藝城影業歷史同作品。