吳克儉年度外訪 次數增多 錢使少咗

【明報專訊】教育局噚日向立法會財委會回覆開支預算提問，唔少議員都好關心教育局長吳克儉外訪用咗幾錢，原來佢2015/16年度都「收斂」咗唔少，用咗48.3萬，金額歷年最低，但次數就歷來最多，達13次。吳克儉鍾意去日本私人旅遊就大家都知，但根據2015/16年度嘅工作外訪紀錄，佢就多數去祖國，13次入面有至少9次都係去內地，包括北京、廣州等，大都係與當地官員及學界會面。佢仲有去新加坡出席國際會議，當然唔少得跳出亞洲啦，飛埋美國同比利時。


歷年外訪37次 花246萬

順帶一提，局長自2012年上任，首年度就用咗56.5萬，出訪4次，包括去英國教育論壇，又去美加宣傳三三四學制同DSE；2013/14年就用咗68.8萬出訪10次；2014/15年度就最豪氣，用咗72.9萬出訪10次，去咗比利時同芬蘭，參考人哋成功經驗咁話。換言之，吳局長上任以來共出訪37次 ，開支共約246萬，但公道啲講，佢每次外訪都有1至3名官員同行，以上開支亦包括隨員使費。