港台宣傳片提「港豬」 通訊局收4投訴

【明報專訊】港台4月2日凌晨接手亞視模擬頻譜，但由港台主持麥嘉緯出鏡嘅宣傳片，提及「唔想做港豬，揀港台電視31」，就畀市民投訴「港豬」一詞有貶義，通訊局由上月21日至噚日收到4宗投訴，投訴人話咁講等同侮辱唔睇港台31嘅觀眾。港台就話已收到相關投訴，會按一貫處理程序跟進。


其實Emily都收到讀者投訴，話呢條宣傳短片內容嘅說話，高度侮辱同涉嫌歧視唔想睇港台電視31嘅香港人。


投訴人Simon Sun話，佢上網搵吓「港豬」一詞意思，發現係用嚟指摘政治冷感、討厭政治嘅香港人，或者只會以「搵食」、「為頭家」做藉口，對社會問題不聞不問，就更加令佢覺得宣傳片內容侮辱。佢要求廣播處長梁家榮道歉，還唔睇港台電視31嘅香港人一個公道。