黃竹坑站交匯處被批不對辦

【明報專訊】港鐵南港島線（東段）目標今年底啟用，當中黃竹坑站嘅公共交通交匯處差唔多完工。但多名南區區議員早前視察後，狠批現場設施同原先設計不符，有貨不對辦之嫌。睇番資料，當年政府預算呢個交匯處造價1870萬元，包括550萬用喺道路同巴士小巴的士站，另外1320萬元就用喺機電同美化工程，係政府委託港鐵興建。


指綠化工程無咗 採光兩回事

3名區議員包括柴文瀚，徐遠華同司馬文噚日邀請傳媒到場採訪。柴文瀚話，當初港鐵嘅交匯處設計圖睇落採光充足，而且仲有連接黃竹坑站至巴士站嘅有蓋行人道路，交匯處中間會種植攀藤植物綠化，但實際情况係無咗有蓋行人道路，交匯處中間嘅綠化工程亦都無咗。


司馬文話，港鐵未來會建上蓋物業，一定影響交匯處採光，仲形容為全港最ugly（醜樣）交匯處。徐遠華就講，港鐵計劃今年6月交還交匯處畀政府，若部門無改善方案，佢哋會要求審計署跟進工程費係咪不當運用。


港鐵﹕考慮實際用途 設計簡潔務實

港鐵回覆話公共運輸設施設計要考慮用途、人流、交通、地理環境等因素，亦要參照政府同類設施設計，加上工程費係公帑畀，設計相對簡潔務實，以及考慮長遠維修管理需要。港鐵又話設施採用自然通風同自然光，會確保符合政府標準。