何柱國下戰書 之鋒唔睬

【明報專訊】全國政協常委何柱國周日喺無綫節目《講清講楚》批評佔領搞到香港經濟差、會有裁員潮，又會滿街空舖，仲點名話前學民思潮召集人黃之鋒係「傻仔」、「白癡」。黃之鋒就回應話，何柱國作為社會有名望嘅人，用情緒式嘅發泄字眼去攻擊同自己政見唔同嘅人幾幼稚。呢番言論，惹來何柱國向佢下戰書，仲話如果輸咗，會向之鋒下跪、叩3個響頭，認自己係「白癡」喎。


銅鑼灣尖沙嘴數吉舖 輸家叩頭

噚日無綫新聞再搵兩人回應，黃之鋒認為，香港經濟問題係因過分依賴自由行、令租金上升，小商戶承擔唔到先被迫結業，對於何柱國話佢「白癡」，佢就認為對方幼稚。何就回應話，唔覺得自己鬧黃之鋒係幼稚字眼，但承認自己係發泄情緒，仲話要向黃之鋒挑戰，同佢一齊去銅鑼灣、尖沙嘴廣東道行街，「叫佢拎計算機數數有幾多『吉舖』」，仲話如果黃之鋒係啱，佢會跪低叩3個響頭、認自己係「白癡」，但如果黃之鋒係錯，就「叫佢『收口』，向我鞠三個躬，自認『傻仔』、『白癡』」。


黃之鋒回覆Emily話，唔會接受何柱國嘅挑戰，「因為唔想將政治討論娛樂化」。