德銀：萬達私有化得把口

【明報專訊】萬達商業（3699）擬私有化單嘢轟動股壇，不過德銀噚日就出報告潑冷水，話萬達可能只係得把口，仲搬埋舊年高銀地產（0283）私有化話做唔做單嘢出嚟比較。不過，德銀話唔理佢係咪靠嚇，短期內都會刺激股價向上，但就建議大家都係留意番基本因素。


前日萬達商業失驚無神公布，話母公司初步考慮用每股48元收購佢嘅H股做私有化，較當日收市價高出足足兩成幾。德銀噚日就出報告，話萬達無實牙實齒話一定會私有化；仲擺埋高銀地產上枱，話佢哋留意到，次次出現呢類無約束力嘅私有化提議，最後都喺唔會落實㗎。不過，德銀都講，事件係會令股價喺短期內上升，所以都將萬達評級為「購入」，購入價為42元，但就建議大家要留意基本因素。


老老實實，小琴唔知萬達喺咪真喺會私有化，但噚日佢嘅股價短短一日飈升咗差唔多兩成，由38.8元炒到上到45.95元，仲高過德銀嘅建議購入價"口添"。