財爺幫旅發局拍片 爛gag宣傳香港

【明報專訊】財爺曾俊華為旅遊界「出錢」出力，除咗預算案撥2.2億協助旅遊業，仲親身上陣拍宣傳片，條片口號係「發揮香港本色」、「We Make The Difference」。咁好易令人聯想特首選舉前哨戰，負責邀請佢嘅旅發局主席林建岳（岳少）即刻澄清話唔關事，政治同旅遊係兩件事，只係見財爺受歡迎，搵佢拍就想有talking point。


岳少仲解釋，搵財爺拍片，一來佢撥咗款，二來佢管旅遊，邀請佢時只係講咗個story board，佢諗咗5分鐘就答應。


條片今日喺旅發局嘅業界展播出，下個月18日會剪輯成政府宣傳片，公眾到時就有得睇。片入面嘅財爺一身劍擊服，喺母校喇沙書院同學生搞爛gag，有學生問佢﹕「阿sir，你會唔會剃鬚㗎？」財爺答﹕「睇show就會！香港嘅show，正到加零一呀！」雖然財爺平日都幾幽默，但今次佢只係照稿讀，唔係爆肚。