太古出書 回顧來華150年

【明報專訊】太古集團不知不覺已經成立200周年，同時亦喺中國成立150年，係呢個特別時刻，紀念呢個大日子，太古將過往發展輯錄成書，首次出版《太古之道：太古在華一百五十年》（圖）。喺書中，仲搵到華人航運家族代表，即前特首及曾掌管東方海外航運業務嘅董建華，寫番英資史懷雅家族，從英國約克郡開始，落戶利物浦嘅世界航運中心，漂洋過海至遠東同香港嘅發展史序言，認真有意義。


書內除了講到大家熟悉嘅國泰航空點起家，仲講到太古來華時，搵過曾著作《醒世危言》同後來加盟發起招商局嘅廣東商人鄭觀應助陣做太古買辦，發大盤生意。太古後來仲喺鰂魚涌開展糖廠、船塢，民國初年又喺內地做過發鈔銀號，同埋原來曾經係香港第五大保險集團嘅有趣歷史。回顧番太古地產（1972）一段，仲講番當年同大昌集團（0088）主席陳斌之父陳德泰合組太古昌發展，策劃發展太古城。值得細味嘅係，內裏有一幀太古船塢同發展成後來嘅太古城前後對比（相），大家可以撫今追昔一番。


email: piano@mingpao.com

[小琴密語]