西九放狗 CY被質疑無收拾狗糞

【明報專訊】特首梁振英（CY）兩隻愛犬老虎狗Speedy同雪橇犬Bond曝光率都好高，早排CY喺禮賓府接待小學生時，兩隻狗都有「出巡」，搞到班小朋友好興奮。梁振英又成日帶住佢哋周圍去，好似前日CY帶佢哋去西九龍海濱長廊嘅寵物區，又畀網民捕獲；但就有人指狗狗大便後，CY並無好好咁處理狗糞，質疑佢唔係有公德心嘅狗主。


網民Charlotte喺facebook話星期日下晝3點幾，喺西九海濱長廊見到CY，但就話CY隻狗大便後，狗主將便溺「用樹葉之類物體推落樹底啲泥嗰度」，當時見到CY問助手拎嘢，以為佢會用袋執番啲大便啦，點知助手只係畀咗支水佢，指用水冲一冲石屎地，然後走人。Charlotte認為如果係行山都無乜所謂，「但喺狗公園，好似唔太衛生喎！」不過，Charlotte上載咗4張CY放狗相，但就未影到狗狗便便情形及「證物」相。


Emily向特首辦查詢想求證事件，至截稿前未獲回覆。Charlotte呢個帖文都引起唔少迴響，有至少逾700個網民轉發，有人話應該「叫佢（CY）食返」，又有人覺得即使係特首，都應盡番狗主責任。