愛將容海恩：葉劉勝任特首

【明報專訊】距離立法會選舉仲有半年時間，不同政黨都正在「排兵佈陣」，新民黨主席葉劉淑儀前日接受訪問時就打晒開口牌，話有意派1月先加入新民黨嘅年輕美女大律師容海恩（Eunice，圖）出戰。Emily都問過容海恩，佢就話對參選「持開放態度」，不過笑言自己「肯定未準備好」。


近年政壇呈現一片年輕新氣象，身為「政治素人」嘅Eunice就好謙虛，承認自己知名度不足，處理政治問題亦唔夠成熟。唔少建制政黨中，新人若要晉身立法會都要由地區做起，過五關斬六將，變相做「插班生」嘅Eunice就認為，選人亦要考慮才能，唔使一定要好似「小學升班」咁排隊嘅。


雖然自認唔識處理政治問題，但面對會唔會支持梁振英連任嘅問題，Eunice就夠醒目，「耍太極」話視乎有咩人參選，但認同下屆特首需得到多啲民心。Emily當然趁機追問，咁被傳有意「跑馬仔」嘅葉劉淑儀又係咪合適人選呢？作為葉太愛將，Eunice爽快即答「完全勝任」。