邵善波批建制 黃國健﹕唔係醉酒噏咗就算數

【明報專訊】立法會近年陷於僵局，中央政策組首席顧問邵善波早前接受傳媒訪問，直斥建制派要負起責任，因為唔夠團結，「40幾個人各自搞搞震」，批評佢哋每月收10萬蚊人工都唔「坐定定」出席會議。邵善波呢番話似乎激嬲咗唔少建制派，工聯會黃國健（KK）噚日出席港台節目《城市論壇》就話，建制派如果真係搞搞震，政府政策同條例喺立法會就會寸步難行，希望對方澄清言論，而「唔係飲醉酒，或者講得high過頭，自high，噏咗出嚟就算數」。KK喺節目後就話，諒解邵善波可能「護主心切」喎。


同場嘅自由黨主席鍾國斌（Felix）批評政府將管治問題嘅責任推去建制派，反問「點解政府自己唔處理好」，又話如果40幾個建制議員嘅理念一樣，咁就不如唔分黨派，索性叫「建制黨」就得。Felix喺節目後再次批評邵善波嘅講法不負責任，侮辱建制黨派智慧，政府應反思點解建制派唔係完全支持政府。


民建聯主席李慧琼嘅反應相對溫和，話邵善波可能見到政府施政困難先有感而發，但都強調建制派唔係「鐵板一塊」，雖然各黨可以喺共同議題走埋一齊，但客觀嚟睇彼此一向都係競爭對手。