西九自由約 9月再會 草坪唞唞

【明報專訊】西九文化區管理局嘅「自由約」活動噚日完成最後一場，將會暫別大家5個月，9月再搞。噚日大會呼籲市民攜犬入場玩，成個苗圃公園好熱鬧。西九由去年8月至今搞咗13日自由約，共53,700人次入場，噚日有8700人次，仲有400隻狗狗參與，反應勝預期。


管理局噚日同傳媒野餐，藝術發展（戲劇）主管劉祺豐話今年1月底強烈寒潮襲港，市區氣溫跌到3.1℃，但都有600人次入場支持，喜出望外，但咁多人入場亦令中央草坪嘅草地開始光禿禿，所以暫休5個月，當畀啲草「唞吓氣」。


栢志高愛犬變神秘嘉賓

行政總裁栢志高喺野餐期間帶埋10歲愛犬Archie以「神秘嘉賓」身分現身，Archie不時喺草地扭吓扭吓，似乎好鍾意塊草地。栢志高話平日帶開Archie去將軍澳嘅公園玩，日後西九公園嘅規則亦會同苗圃公園一樣。最近西九公布由嘉里建設前執董陳惠明做新營運總裁，Emily問栢志高，陳惠明似乎少咗啲文化背景喎，栢志高反問「點解需要文化背景？」佢話西九已經有好多文化藝術人啦，陳惠明最重要係處理建築工程嘅進展。


西九苗圃公園開幕至今8個月，已向街頭表演者發咗超過300張牌，包括經常喺「自由約」演唱嘅大學生Waimond同Bonnie，佢哋話西九係個唔錯嘅表演場地，令佢哋Instagram粉絲人數倍升，希望再續牌嚟西九玩。