「只博讀者一笑」 曾鈺成對聯：梁振英對國安法

【明報專訊】立法會主席曾鈺成嘅報章專欄內容不時都可堪玩味，今次曾主席就談及文字遊戲「無情對」，話「這種對聯很有趣」，仲以「梁振英」作上聯，對出咗下聯「國安法」。曾主席自言「堪稱工整」，但強調「既是無情對，上下聯互不相關，也沒有任何寓意，只博讀者一笑」。


專欄談無情對 自言「堪稱工整」

曾主席喺《am730》專欄指出，「無情對」上下聯嘅內容互相無關係，離得愈遠愈妙。佢話無情對古已有之，晚清特別流行，人名係無情對常用嘅素材。例如「張之洞」呢個名就被拿來對「陶然亭」。


曾主席喺文中用特首「梁振英」嘅名字來對，話「梁」除咗係姓氏，亦係名詞，同地形有關，對以「國」，對類平仄皆合；「振」係動詞，如「振動」，都有由靜起動嘅含義，所以可對以動詞「安」，有由動歸靜嘅意思；「英」係國家名，可對以另一國名「法」。結果就係「國安法」對「梁振英」。